وانت بتختار شريك حياتك

متروحش تقوله انا ADHD 😏

👈لأ قوله مشاكلك

يعني مثلا انا حد فوضوي

عندي مشكلة مع النسيان 

وبتغلب عليها بكذا

⭕ اشرح الأعراض اللي عاملة مشكلة 

وشوف هل هايتقبلها ولا لأ ؟

هل هايقدر يساندك ويساعدك فيها ولا لأ ؟

👈دا الاهم

إنه يقدر يتقبلك🧑‍🤝‍🧑

يعرف ايه اللي ممكن يعطلك

وهل هايقدر فعلا يساعدك ولا لأ ؟

لو احتجت مساعدة

👈وايه اللي انت هاتقدر تقدمه ليه بالفعل؟

هل انت تعرف🤔

لأ 🤷

الحقيقة انت غرقان في مشاكلك

لدرجة انك مش شايف لك ميزة😞

وعندك شعور بقلة تقدير الذات 

موصلاك انك متستحقش أصلا شريك حياة🙆

يبقى👀

✓متتجوزش طول ما انت شايف نفسك متستاهلش شريك حياة

✓متتجوزش الا لما تقدر تهندل حياتك اصلا 

يعني اقعد مع نفسك او مع حد عارفك كويس

واعرف مشاكلك الحقيقية

ايه اكتر مشكلة مأثرة عليك

واشتغل عليها الاول قبل الجواز

وافهم هاتأثر عليك ازاي بعد الجواز👌

👈وكمان إيه هي مميزاتك.؟

وازاي تقدر تستغلها لصالحك🥰

وهل هي كافية بالشكل دا ولا محتاحة منك 

إنك تشتغل عليها

⭕طيب أنا مش عارف ألاقي ميزة😐

هنا دور المرشد او المينتور 

يساعدك تشوف مميزاتك 

تفهم نفسك اكتر

ترتب أفكارك 

وخليك فاكر

محدش فينا معندوش عيوب

سواء كان عنده اضطراب ولا لأ 🙈

فمتجيش على نفسك 

وتقول أنا مش نافع

امتى هابطل اجري وراه عشان يعمل اللي عليه😭

أنا تعبت ومبقاش عندي أي طريقة تخليه يقوم من مكانه

طيب لحد امتى هاعمل جداول وادي مكافآت عشان بس 

يقوم من السرير🙆

ليه المراهق اللي عندي مش مبسوط ومعندوش رغبة يعمل أي حاجة 

ليه مش مهتم بمستقبله ونجاحه😢

ليه مبيغيرش من زمايله ويقوم لوحده يذاكر 

حد عنده إجابة😁

أنا عندي إجابة🧐

هو اصلا يعرف هو ليه بيذاكر؟🙄 

طيب هو عارف لما يخلص مذاكرة هايوصل لايه؟

وهل اللي هايوصل له دا هو فعلا عاوزه؟🤔

طيب هل هو أصلا يقدر يوصله ولا لأ ؟

كل الاسئلة اللي ملهاش اجابة عنده دي 

موصلاه لفقدان الرغبة أصلا في إنه ياخد خطوة ويذاكر

ولو خد خطوة وذاكر تحت ضغط

 فهتكون مذاكرة مفيهاش ريحة الاتقان

بذاكر عشان ترتاحوا او عشان تسيبوني في حالي

بعمل لكم اللي انتوا عاوزينه 🙄

طيب ايه الحل؟

الحل إنه يحس إنه قادر يغير في حياته ويختار بناءا على رغباته

عشان يوصل لمرحلة الاتقان اللي نتمناها

وعشان نفهم أكتر👇

علماء علم النفس قسموا الطريقة اللي بتدفع الانسان يعمل أي حاجة لشكلين

⭕التحفيز الخارجي

⭕التحفيز الداخلي

نتكلم الاول عن 

⭕ التحفيز الخارجي 

وهو نوعين 

✓اما رغبة في المكافأة

✓أو خوف من العقاب

👈والمكافأة بالظبط زي ما بنقول لولادنا 

لو خلصت طبقك هاجيبلك شيبسي😁

أو لو ذاكرت كويس ونجحت هاجيبلك عجلة🚴

الطريقة دي في التحفيز 

👈بينما العقاب ماشي على نفس المبدأ ولكن بشكل سلبي

لو مذاكرتش مش هاتتفرج على الموبايل 

⭕في الحالتين بتعتمد على المعززات الخارجية 

نظرية

🫲 إذا ..... فسوف........🫱

وهي طريقة بتفيد فعلا لكن ليها حالات معينة تنفع فيها

وليها شروط كمان 🥰

👈طيب إيه هي الحالات اللي تنفع معاها نظرية التحفيز الخارجي 🤔

✓ السن الصغير للاطفال لانهم معتمدين بشكل أساسي على المكافآت وخايفين من العواقب

✓ المواقف الواضحة المحددة السهلة مفيش فيها تلاعب وكمان مفيش فيها تفكير أو ابداع

✓ الاعمال الروتينية المملة اللي الواحد بيعملها عشان لازم تتعمل

طيب خليني أدي مثال

إذا رتبت أوضتك كل يوم هاتاخد مني 20 جنيه😁

هنا دي

👈 مهمة واضحة ✓ترتيب الاوضة

👈محددة ✓ فيها خطوات ثابتة

👈سهلة ✓ لاننا اتدربنا عليها قبل كدة 

👈مفيش فيها تلاعب ✓ هاترتبها هاتاخد العشرين جنيه الاتفاق اتفاق

👈مملة ✓ بتحصل كل يوم 

⭕طيب هاتقوليلي ما هو المكافأة مبقتش بتخليه يرتب أوضته😤

يبقى هنحتاج نتنقل للمستوى التاني وأسألك سؤال مهم

انتي بتقري البوست دا دلوقتي ليه😊

عرفيني في الكومنتات😉

طيب انا هافترض انك بتقري البوست عشان خايفة على ابنك🥹

 ودا هاياخدنا 

⭕ للتحفيز الداخلي 

التحفيز الداخلي هو شعور بيدفعنا نعمل حاجه معينة مفيش فيها مكافأة ولا عقاب برغبة واضحة مننا🥰

اهااا

يعني التحفيز الداخلي دا شعور بنحس بيه تجاه حاجة احنا محتاجين نعملها لسبب ما ملوش علاقة بالمكافأة 

بس ايه هو السبب الما دا😂

عندنا تلات عناصر للتحفيز الداخلي 

☝️ الاستقلالية🌝

أنا حاسس إني سيد قراري فبقيت

✓ قادر على اتخاذ قراري من غير لوم ولا خوف ولا تقييد

✓ مسؤول على عواقب قراري 🫴

 ✓ ماشي ناحية هدفي بكل قوتي لانه هدفي المستقل 

هاديكم مثال لما قررت إني أكتب عن موضوع التحفيز اصلا 

أنا كنت

 قادرة على اتخاذ قراري يعني محدش منعني او وقفني

 مسؤولة أكتب البوست التاني لان دا عواقب قراري 

 ولو كنت اتأخرت عليكم شوية😅

✌️ الرغبة 😉

وبما إني مسؤولة وقادرة على اتخاذ قراري

فأقدر اختار القرارات اللي تناسبني فعلا 

واللي أحس إني عاوزة اعمله

وهاديكم مثال

عمركم قابلتم حد قرر يعمل كاريير شيفت ويغير مجاله تماما

ويسيب وظيفته في شركة عشان يفتح مشروعه الخاص اللي ممكن مينجحش من أساسه🫠

بس هو هنا كان قادر فعلا ياخد القرار 

ومسؤول مسؤولية كاملة عنه 

بس مدفوع في رغبته في إثبات ذاته مثلا 

أو لان الوظيفة القديمة مكانتش مناسبة لامكانياته 

المهم انه قدر يتبع رغبته في التغيير

🤝 الاتقان 😁

ما هو قراري ودي رغبتي وأنا مسؤول وقادر

فهاطلعها بأكمل وجه 

هاحاول بكل طرقي أكون متقن لما أفعله

لان دا هايكمل شعوري بالنجاح اللي قدمه ليا التحفيز الداخلي 

بكل بساطة🥰

⭕طيب أنا كأم دوري إيه هنا مع طفل فاقد الرغبة 😤

ومعندوش تحفيز داخلي

قبل ما يوصل للرغبة

هو عاوز يكون قادر على اتخاذ قراراته

وللاسف لحد دلوقتي دا مبيحصلش من الاسرة

👈المراهق هنا عاوز دعم عشان 

✓ أولا يكتشف نقط قوته

 وبعدين يعرف إزاي يوظفها ويستخدمها صح ولو مش عارفين ازاي تكتشفوا نقط قوته هابعتلكم ملف PDF فيه اسئلة تقدروا لما تسألوها ليه تعرفوا بس سيبوا كومنت بكلمة مراهق😍

✓ ثانيا يعرف نقط ضعفه

 وإزاي يشتغل عليها عشان متوقفوش بردو ولو مش عارفين ازاي تكتشفوا نقط ضعفه هابعتلكم ملف PDF فيه اسئلة تقدروا لما تسألوها ليه تعرفوا بس سيبوا كومنت بكلمة مراهق😍

انتي لازم تصالحيني عشان انا اعتذرتلك🤔

دي جملة محمد ابني بيقولها لي لما يبقى غلطان وعاوز يتأسفلي😊

طبعا الكلمة الصح انتي لازم تسامحيني عشان انا اعتذرتلك😅

لكن الكلمات والجمل الغلط اللي بيقولها طفل ال ADHD

في الاوقات دي بتكون عبارة عن نقص في الذكاء الاجتماعي 

مش مسألة تحصيل لغوي ناقص على الاطلاق

دي مشكلة في صياغة الكلمات عشان تدي جملة مفيدة 😔

وللاسف دا بيحصل لاي شخص فرط حركاوي لو اتحط تحت ضغط أو كان في موقف محرج 😅

✓بيتوتر جدا 

✓بيتلخبط بسهولة

✓بيتشتت والكلام بيهرب منه

✓وبيحس ان فيه سراب في دماغه ومبيعرفش هو المفروض يقول ايه

وطبعا الكلام دا بيخلي الطفل أو الشخص بيقول كلام ملغبط أو مش مفهوم اوي

أو يمكن كلام معاكس للكلام اللي المفروض يقوله

كمان في الوقت دا الطفل بيحاول يدافع عن نفسه فممكن يهاجم الشخص اللي بيلومه أو قدامه في اللحظة دي😔

كنوع من انواع الدفاع عن النفس 

وطبعا دا بيصور الطفل في اللحظة دي انه قليل الادب او مش متربي😅

والطفل اصلا الكلام بيتقال منه غصب عنه للاسف😔

وكمان ممكن يدخل في نوبة تهتهة ودا موقف مؤلم جدا😔

انا نفسي اتعرضتله كتير 

بحس الكلمة بتقف على لساني وتتقطع وببقى حاسة اني لساني هايتشل حرفيا😭

موقف متمناش أي طفل أو شخص يتعرضله 

الحل في الموقف دا اني احاول اهدي الطفل على اد ماقدر

اعدي الموقف اللي اتوتر منه بهدوء

واستنى لما الطفل يهدى وبعدين اتكلم معاه

ولو الشخص كبير لازم ياخد جنب وقت العصبية او في المواقف المحرجة يتجنب انه يرد بسرعة 

ياخد وقته شويه قبل مايرد 

طيب هل فيه حل الطفل يعرف يتكلم بشكل صحيح حتى تحت الضغط 🤔

⭕أه طبعا برنامج كورت لتوسيع الادراك الاجتماعي بيعلم الطفل ازاي يفكر بشكل موضوعي 

بيخليه يكتسب عشر مهارات أساسيين مهمين جدا للتعامل مع المجتمع 

_هو لو فيه حد معندوش موهبة يعمل ايه 🥹

- معندوش موهبة ازاي فهميني

_يعني مبعرفش ارسم زي اختي او اعمل اكسسوار او اي حاجه من اللي تخلي عندي موهبة😔

    - مش لازم يكون عندنا موهبة في حاجة معينة المهم نكون بنحب نعمل حاجه معينة 

بتحبي تعملي ايه😍

_بحب افك الاجهزة واركبها😅

وبحب اتعلم كوري وحافظة كلمات كتير وجمل وحافظة من واحد لحد مية بالكوري 🙈

بس عندنا في البيت شايفين اني بضيع وقت في حاجة مش مفيدة ومش هاتنفعني🥺

دا كلامي مع بنت في تانية إعدادي كانت جاية مع اختها الصغيره في سيشن😔

اكمل الحوار 👀

طبعا ابديت اندهاشي الشديد بموهبة من العيار التقيل في تعلم اللغات

واللي شايفة. إنه سهل جدا جدا نتعلم كوري

لكن الاهل شايفين ان دا مش مفيد

وملوش لازمة

لانها لو ركزت اكتر في مذاكرتها هايكون أحسن ليها 😏

ودا لان البنت اتعلمت كوري عشان معجبة بفرقة بتغني

طيب خليني اتكلم على كذا محور

_ أولا 

دي موهبة ممتازة من طفلة في سنها  

وانا كعلياء اقدر اثبت لكم بالدليل🥰

* تخيلوا ان الطفلة دي اتقنت اللغة الكورية بشكل معقول 

ورحنا قدمنا طلب في وزارة التعليم العالي انها تلتحق بكلية الالسن قسم كوري

ودا لتفوقها في اللغة في سن مبكر💚

* تخيلوا كمان إن الطفلة دي ممكن تعلم أطفال غيرها كوري ودا انا طلبته منها وتكون بداية ليها لنجاح كبير ومستقبل ممتاز

* طب تخيلوا ان البنت اللي بتحب تفك وتركب لو اتعلمت برمجة روبوتات وكملت دراستها للكوري وقدرنا نجيب لها منحة تكمل تعليم في كوريا🥰

هاه عندكم أفكار تانية ليها ولا ايه🙈

_ثانيا 

نيجي بقى للمجتمع والقوالب المتجمدة اللي بتشوف مستقبل الأطفال من زاوية كلنا عارفينها

وهو دا اللي بنحاول نغيره بكل الطرق الممكنة والغير ممكنة

 والمجتمع اللي بيصب الأطفال كلها في قالب واحد

وصل لبنت موهوبة بالشكل ده

إنها تقول على نفسها 

انا معنديش أي ميزة😭

في آخر الكلام بيني وبينها 

اتفقنا إنها لو ذاكرت لمدة أسبوع واجتهدت هاشوفها تاني نقعد تعلمني كوري

ولو لقيتها شاطرة 

هاجيب لها ولاد صغيرين تعلمهم بمقابل بسيط🥰

ويااارب يتحقق حلمي ونوصل لوقت نقدر يكون عندنا مكان ندعم فيه الطاقات المهدرة دي 

ونعزز عندهم ثقتهم في نفسهم

ونخرج جيل واعي فاهم مختلف

حضنك حلو اوي انهارده 

انت اتعلمت تحضنني من غير ما توجعني😍

- هو انا كنت بوجعك وانا بحضنك🤔

كنت قوي جدا ومكنتش بتعرف تسيطر على قوتك 🤍

بس دلوقتي اتعلمت جدا جدا 🥹

الجملة دي رجعتني لذكريات كتير عشتها مع محمد ابني🥰

من أول ما كان بيخاف من كل الناس حرفيا 

إلا انا🙈

من أول حاجة كسرها لما مشي وهي ازاز الكومودينو😁

وازاي حياتي اترتبت بعد وجوده عليه هو 😊

من أول ما شوفته وحسيت إني مش متقبلة إن دا ابني

رجعوه وهاتوا واحد تاني مبيعيطش طول الوقت 🤣

لحد ما بقى أقرب انسان لقلبي🌸

من أول ما عرفت انه عنده اضطراب فرط الحركة وتشتت الإنتباه 

وقعدت اعيط وأقول ليه ابني يعيش باقي حياته مش عارف يتعامل مع الناس 

مكنتش فاهمة حاجة ساعتها😔

لحد ما خلاني اكتشف إني كمان عندي ADHD واقرر اتعلم كل حاجه تخص الاضطراب واساعد أمهات غيري تعرف ازاي تتعامل مع ولادها💚

من أول ما بدأت أعلمه الحروف والارقام واكتشف إن عنده صعوبات تعلم 🥲

لحد ما اكتشفت إنه عبقري بمقاييس اختبارات الذكاء 🥰

وبقى مستوانا كويس جدا في المدرسة ومع المدرسين🤍

من اول ما اكتشفت إن عنده اضطراب التواصل الاجتماعي (SCD) وهتكلم عنه كتير الفترة الجاية ان شاء الله 

وملوش ولا صديق😓

لحد ما وصلنا إنه بقى عنده اصدقاء في كل مكان الحمد لله 😍

من اول ما قالي أنا بكره محمد 😔

لحد ما بقى بيقول انا بطل ولازم اتصرف زي البطل🎖️

رحلة طويلة عريضة عمرها 10 سنين🥰

والحقيقة مكانتش 10 سنين كانت اكتر بكتير 

يمكن معرفتش ابدأ معاه بداية حقيقية إلا من 3 سنين

بس اللي قبله هو علمني فيه كتير جدا 💪

كل يوم بكتشف إني مكنتش قوية غير بوجوده

متعلمتش أقف على رجلي غير لما بقى في حياتي

مفهمتش نفسي إلا لما فهمته

وعشان كده أنا هاكمل الطريق ان شاء الله 

هاكمل لانه موجود هو وأخوه💚

وأنا متأكدة إن اللي بنتعبه دلوقتي هنلاقيه في كل خطوة بنمشيها بإذن الله 

عاوزاكم تكملوا معايا الطريق 

متستسلموش

أنا عارفة انكم تعبتم🥹

بس كل ما تحسوا بتعب أحضنوهم 🫂

وافتكروا إنهم هنا عشان نفهم نفسنا أكتر 

عشان يكملونا🌓

اللهم أجعل أولادنا زرعا صالحا لنا🤲

إبني مش غب.ي عشان اعمل له اختبار ذكاء 😐

الجملة دي بسمعها كتير لما ام في الجلسات بطلب منها تعمل اختبار ذكاء (ستانفورد بينيه)

وخليني أقول ليه اصلا بطلبه🤔

⭕ أولا الاختبار بيكشف المهارات اللي ناقصة عند الطفل فنقوم نشتغل عليها👌

⭕ثانيا الاختبار بيكشف المهارات اللي الطفل متميز فيها فنقوم نشتغل عليها اكتر ونعززها😊

👈انما الرقم الاجمالي بالنسبة لي هو تحصيل مجموعة مهارات اكاديمية عند الطفل بتكون زي الترمومتر بالنسبة للاخصائي

 ولكن

⭕ الاختبار ليه شروط مهمة هاقولها في اخر البوست💚

انما الاهم ايه هي المهارات بقى اللي الاختبار بيقيسها🤔

خد عندك يا سيدي

👈 المعالجة المكانية البصرية بمعنى قدرة الطفل على نقل الاشكال أو وصفها بدقة 

👈 الاستدلال السائل اللفظي بمعنى قدرة الطفل على فهم الاسئلة والرد عليها زي ليه وامتى وفين وبم تفسر وكيف ودا بيبين مشاكل الادراك عند الطفل لو ناقصة أو بيبين اد ايه الطفل عنده موهبة في التحدث والرد على الاسئلة

👈 كمان الاستدلال السائل الغير لفظي ومقصود بيه انه يكون فاهم العلاقة بين الاشكال والاسئلة الرياضية زي اثبت ان المثلث مثلث🤣

👈 الذاكرة بأنواعها سمعية وبصرية ودي من الحاجات المهمة جدا اللي على اساسها بنقدر نشتغل مع الطفل على اللي يقويها لو ضعيفة 

👈 صعوبات التعلم زي مشاكل القراءة والكتابة 

👈 وغيره كتير 

ولكن

ازاي اقدر اتأكد ان طفلي فعلا دي نتايجه الحقيقية؟

وزي ما قولتلكم شروط نجاح الاختبار

⭕ الطفل ميتقالوش تعالى رايحين امتحان انما تعالى نلعب شوية

⭕قبل ما يدخل الاختبار يحكي مع الاخصائي اللي هايعمله وياخد عليه وميكونش قلقان منه

⭕ميبقاش الطفل تعبان او مرهق او عاوز ينام واخده يعمل اختبار ذكاء 😅

⭕واخيرا وليس آخرا نشوف نموذج من اختبار ذكاء للاخصائي ونتطمن انه موضح كل حاجه فيه مش مختصر الاختبار😐

_بابا بيزعق لما بيتضايق 🤔

يبقى الزعيق حل مثالي اعبر بيه عن ضيقي🙆

(حل مثالي سهل)

_ ماما بتقول انها هاتسيب البيت وتمشي لما بنعمل شقاوة

يبقى ماما مبتحبناش أصلا وعايشة معانا غصب عنها😔

(عدم فهم التهديد العاطفي)

_صاحبي بيقول إني أغبى واحد في الفصل عشان معرفتش 6×7 بكام

يبقى أنا فعلا أغبى واحد في الفصل طالما هو شايف كدة 😕

وأي حد هايغلط بعد كدة يبقى غبي 🤷

(حقيقة مطلقة)

_ الولاد في الشارع بيشوفوا إن الضحك على اللي بيقع مجرد هزار لطيف 

يبقى انا أضحك على أي حد بيقع عشان اهزر معاه🥳

(تقليد السلوك مع عدم فهم النية)

_ ماما قالتلي متخليش حد ياخد حاجتك منك

يبقى أنا مش هاشارك أبدا أي لعبة من ألعابي مع أخويا 😤

(ضعف المرونة)

👈 الامثلة اللي فوق دي بتقول إن الطفل عنده مشكلة في (الفلتر العاطفي)

ايوة انا سميته كدة 🥳 الفلتر اللي بيخلينا نفهم الفرق بين

✓ الجد والهزار 

✓ اللي ينفع لموقف واللي ينفع لكل موقف

✓ التعميم في المشاعر ( انا سقطت في الامتحان إذن أنا فاشل)

ولما بيكون الفلتر دا للاسف الشمعة بتاعته عطلانة هاتدخل لنا كل المشاعر بمعناها الحرفي ( فشلت في الامتحان يبقى الفشل عنواني😤)

👈 ازاي الفلتر دا بيكون عطلان بقى🤔

اتكلمت قبل كدة كتير عن ضعف الادراك الاجتماعي 

هايكون دا في بوست لوحده هاسيبه في الكومنتات 

👈 ازاي أصلح الفلتر طيب؟

للاسف هو نفسه مبيتصلحش إنما احنا بنعمل للطفل فلتر صناعي جديد بالسيكودراما (تمثيل الادوار) 

(وبرنامج كورت لتوسيع الادراك اللي نزلتلكم منه حلقات كتير من تصميمي😍)